Deustuko Unibertsitateak eta Arantzazulabek elkarlaneko beste urrats bat eman dute gaur, martxoak 27. Akordio horrek sakondu egingo du, ikerketa eta prestakuntzaren arloan, bi erakundeek demokraziaren berrikuntzan sakontzeko eta lankidetzazko gobernantzan aurrera egiteko duten konpromisoa. Akordioaren berritasun nagusia bi erakundeen arteko lankidetza da, Demokraziari, Erakunde Publikoei eta Gizarte Berrikuntzari buruzko Masterraren esparruan.
Ildo horretan, Arantzazulabek berrikuntza demokratikoko prozesuetan oinarritutako irakasgaiak eskainiko ditu, eta gizartearentzat zabalik dauden nazioarteko mintegien diseinuan eta zabalkundean parte hartuko du. Saio horiek gaur egungo erronka demokratiko nagusiei buruzko eztabaida sustatzera bideratuko dira, demokraziaren berrikuntzaren eta berrikuntza publikoaren arloko nazioarteko adituak erakartzeko. Era berean, talentua sustatzeko laguntzaren erakusgarri, beka bat emango da ikasketa horiek egiteko.
Hitzarmen honek jarraipena ematen dio bi erakundeen arteko azken urteetako harremanari, Arantzazulab laborategiak sustatzen duen demokrazia eta lankidetzazko gobernantzari buruzko hainbat ikerrildotan lan egin baitute Euskal Herriko Unibertsitatearekin eta Mondragon Unibertsitatearekin batera.
Hitzarmena sinatzeko ekitaldian izan dira Naiara Goia, Arantzazulabeko zuzendari nagusia; Xabier Riezu, Deustuko Unibertsitateko Donostiako Campuseko errektoreordea; Ane Ferran, Gizarte eta Giza Zientzien Fakultateko dekanoa; Martin Zuñiga, masterreko zuzendaria, eta Eider Landaberea, Euskal Herriko Unibertsitateko (EHU) eta Mondragon Unibertsitateko (MU) ikertzaileekin demokraziaren kalitateari lotutako ekimenetan lan egiten duen ikertaldeko irakasle titularra eta arduraduna.
Deja un comentario