Larrialdiko prozeduraren bidez egingo dituzte abuztua amaieran Deba eta Mutrikuko zubia erortzea saihesteko eta haren kontserbazioa eta birgaikuntza bermatzeko lanak. 1,2 milioi euroko kostua izango dute eta fase honetako lanak amaitzeko epea hamar astekoa da. Zubi hau birgaitzeko egingo den bigarren fasean zubiaren bi bobedak harriz harri berreraikiko ditu Gipuzkoako Aldundiak.
Denis Itxaso Kultura diputatuak eta Pedro Bengoetxea eta Jose Angel Lizardi Debako eta Mutrikuko alkateek prentsaurreko bat eman dute gaur, zubi hau birgaitzeko egingo diren bi faseen jardueren berri emateko. Zutabe nagusia uztailaren 5ean hondoratu zen. Oinezkoentzako zubi honek babes bereziko kalifikazioa du, monumentu multzo moduan, Donejakue Bidearen testuinguruan.
Lehen fasean gangak erortzea saihestu nahi da, baina jarduketa hori bigarren fase batekin bateragarri egiteko moduan definitu da. Larrialdiko lehen fasearen ondoren, birgaitze integralerako fasea abiarazi beharko da.
Deja un comentario