Alokairuen bataz besteko prezioa 1269 euro ingurukoa da, ohartarazten du EH Bilduk

Idealista.com atariaren etxebizitzaren prezioari buruzko txostenaren arabera, Donostian alokairuen prezioa 14 euro metro karraturaino igo dela salatu du EH Bilduk. Prezioa, zehazki, 14,1 eurokoa da, iaz baino %3,5 gehiago. Urtearen hasieran «beherako joera itxaropentsua hartu bazuen ere», uda ostean gorakada nabarmena izan du.
«90 m2-ko etxebizitza hartzen badugu adibide gisa», adierazten du EH Bilduk komunikatu batean, «hilero 1269 euro ordaindu behar da Donostian, bataz beste. Prezio hauek ez daude jende arruntaren eskura».
Pasa den astean Eneko Goiak 2018rako lehentasunak azaldu zituenean, «ez zuen etxebizitzaren prezioari aurre egiteko egitasmorik edota txokezko planik aurkeztu», kritikatzen du EH Bilduk.
EH Bilduren arabera, «zenbait eragileen aldetik, alokairuen prezioaren igoera boom turistikotik bereizi nahi izan den arren, gero eta nabarmenagoa da lotura zuzena dagoela bi fenomenoen artean. Izan ere, turisten gorakadarekin batera geratu da alokairuren prezioaren gorakada».