Aldundiak eskerrak ematen dizkie harrerako familiei eta, oraindik ere, 43 haur etxe bila dabiltzala gogorarazten du

220 lagunek (160 heldu eta 60 ume) hartu dute parte gaur Aldundiak eta Gipuzkoa Beroako Harrera Familiek antolatutako XVII. Harrerako Familien Elkarretaratzean. Maite Peña Gizarte Politiken ahaldunak adierazi duenez, gaur egun, 353 harrerako familia daude Gipuzkoan, horietatik 78 berriak dira, eta 87 haur edo nerabe (batzuetan bat baino gehiago hartzen dute) hartu dituzte, beraz, «arrakasta itzela». Hala eta guztiz ere, «familia gehiago» behar dira. Oraintxe bertan, Aldundiaren ardurapean dauden 342 adin txikikotatik, 43 daude irtetzeko zain, familia bat aurkitutakoan.